Körfubolti: Líkur á að David Ramos fari í leikbann
Allar líkur eru á að David Guardia Ramos, leikmaður körfuknattleiksliðs Hattar, þurfi að taka út leikbann vegna brots hans gegn Frank Booker, leikmanni Vals, í leik liðanna í úrslitakeppni Íslandsmótsins í gærkvöldi.David var vísað af velli um miðjan annan leikhluta í gær eftir viðskipti sín við Booker. Sá síðarnefndi sló fyrst til Davids þar sem þeir biðu undir körfunni eftir frákasti. Þar sem þeir snéru baki í næsta dómara var erfitt fyrir hann að sjá atvikið.
David féll í gólfið og sparkaði þá til Bookers og hitti í punginn á honum. Það var beint fyrir framan nefið á dómaranum sem sendi David út úr húsi.
Valur vann leikin að lokum 94-74 og tók þar með forskot í einvíginu, 2-1, en það lið sem fyrr vinnur þrjá leiki fer í undanúrslit. Næsti leikur verður á Egilsstöðum á mánudagskvöld.
Líkur eru á að David verði í banni í þeim leik. Útilokun þýðir þó ekki sjálfkrafa leikbann en hefur það oftast í för með sér. Þær upplýsingar fengust hjá Körfuknattleikssambandi Íslands í morgun að atvikið hafi verið sent aga- og úrskurðarnefnd sambandsins til meðferðar. Hún kemur saman um helgina og tekur ákvörðun um endanlega refsingu Hattarleikmannsins í tíma fyrir leikinn á mánudag.
Þótt atvikið væri nálægt varamannabekk Hattar horfðu þeir sem þar voru annað á örlagastundinni. „Ég sá þetta ekki nákvæmlega en dómararnir telja sig hafa séð þetta,“ sagði Viðar Örn Hafsteinsson, þjálfari Hattar.
Flest lið deildarinnar, þar á meðan Höttur, eru komin með búnað þannig dómarar geti horft á vafaatvik aftur, til dæmis meint olnbogaskot Bookers. Slíkur búnaður er ekki á Hlíðarenda. „Það er skítlélegt að hér sé ekki myndbandsbúnaður. Hér er ömurleg aðstaða og hörmulegt að spila,“ bætti Viðar Örn við.
Mynd: Daníel Þór Cekic
